Registro n. 2 precedente | 1070 di 1791 | successivo

1070. Francesco Sforza a Luigi Valois, il Delfino 1450 dicembre 4 Milano

Francesco Sforza si duole con Luigi Valois, il Delfino, per non avere ricevuto alcuna risposta alla sua lettera di comunicazione della presa di Milano.

[ 284r] Illustrissimo domino Dalphino, regis Francie primogenito.
Cum animum et mentem meam ad mediolanensium et ligurum partes divertissem, dictionis gratia obtinende, tandem, uti Deo placuit, ad Mediolani dominium sum evectus meoque fretus desiderio varios inter labores dicto evasi, quam ob rem, ut debitum exsolverem michi persuasi victorie huiusce illos in primis conscios reddere quos dudum superiores accepi, quique haud aliter quam ego ad cognitatem meamque amplitudinem excubare videntur. Attendens sane invictissimam et christianissimam Francie stirpem, cui iam omnis mea domus ea que decet observantia et devotione debita est, veluti illam quam nonumquam ad Sforcianum decus prospicere cognovi, illi in primis superioribus diebus opportune scripsi de victoria quam, Deo duce, mihi vendicavi per tubicenem quendam meum Iacominum Carmagnolam nomine, utque ex relacione unius araldi prelibate illustris dominationis vestre accepi longe illam admirari nullum sibi responsum suas ad litteras dedisse illi Iacomino obsignatas sciat vostra illustris dominatio Iacominum illum numquam reddiisse neque ex quo hanc abiit vidisse et nullas ab eo litteras accepisse, quas si accepissem pro ceteris gratiores habuissem uti fides et devotio mea dudum illi prestite exigunt et requirunt. Agat causam vestra illustris dominatio ut si quid importancie et responsione digni littere ille michi afferebant certior fiam, ea vero omnia qua a prelibata dominatione vestra accepere observantissime exequar. Statui profecto vitam statum liberos meam denique substanciam omnem exponere pro beneficio et amplitudine status illius et tocius regie domus Francie, quemadmodum hactenus facere consuevi et uti facere intendo. Ex Mediolano, iiii decembris 1450.
Franciscusfortia Vicecomes, dux Mediolani, et cetera, Papie Anglerieque comes ac Cremone dominus.
Cichus.